Gunita

Kay sarap malasin ng mga tanawin
sa may silangan, sa may baybayin,
Ang bawat pagsayaw ng alon sa kumpas ng hangin
waring idinuduyan ang aking damdamin.
Sa may batuhan sa ilalim ng lilim
aking nasulyapan isang naninimdim
waring minamalas ang nag daang pag-giliw
gunita ng kahapong pilit sumasaling.

Gaya ko ngayo'y nangungulila
sa isang pagsintang hindi naapuha.
Pagibig kong laan sa puso nagmula
kanya itong binaliwala.

Tulad din ng along humahalik sa dalampasigan
nag papahiwatig ng kanyang pagmamahal
at itong buhanginan, hindi man natitinag
sa kaibuturan nito'y iyong mababakas
ang muling pag asam sa mahal na nililiyag.

Sa pagsapit ng dapithapon, sa pagsilong ng liwanag
ang katahimikan ay babalot na tapat
upang ipaghimbing ang maghapong bagal
na muling haharap sa ihahaing bukas.

Sa muling pagsilip ng liwanag sa may dakong silangan
ang patuloy na pag-alon ang siya paring mababakas
at sa pagdating muli ng panibagong umaga,
sa kumpas ng hangin, maalong karagatan mapapagod mandin,
ito'y mamamayapa, hihilom sa pusong may dusa.